Ólafía Þórunn Kristinsdóttir, GR, og Valdís Þóra Jónsdóttir, GL, hafa lokið keppni á 2. stigi úrtökumótanna fyrir LPGA atvinnumótaröðina í golfi í Bandaríkjunum. Þær eru báðar úr leik og komast ekki inn á lokaúrtökumótið.
Leiknir voru fjórir keppnishringir, 72 holur, og komast um 40 efstu áfram inn á lokamótið.
Keppnin hófst mánudaginn 14. október og var keppt á Plantation Golf / Country Club í Bandaríkunum. Keppnisvellirnir voru tveir, Bobcat og Panther.
Ólafía Þórunn lék hringina fjóra á 292 höggum (+4) (74-75-72-71). Ólafía endaði í 94. sæti og hefði hún þurft að vera á -3 samtals eða betur til að komast áfram. Ólafía var með keppnisrétt á LPGA og öðlaðist hann á sínum tíma með því að komast í gegnum úrtökumótin.
Valdís Þóra lék hringina fjóra á 296 höggum (+8) (75-76-74-71). Hún endaði í 134. sæti en til þess að komast áfram hefði Valdís þurft að vera á -3 eða betra skori.