Tveir kylfingar deila toppsætinu eftir fyrsta hring á B59 Hotel-mótinu í golfi sem hófst á Leynisvelli klukkan átta í morgun en það er fyrsta mótið á mótaröð Golfsambands Íslands á árinu 2020.
Atvinnukylfingurinn Haraldur Franklín Magnús og áhugakylfingurinn Hákon Örn Magnússon léku báðir á 67 höggum og eru því fimm höggum undir pari.
Haraldur fór vel af stað og fékk m.a. örn á fjórðu holu. Þá fékk hann fjóra fugla á síðustu sex holunum. Fékk hann alls einn örn, sex fugla og þrjá skolla á holunum 18. Leikur Hákonar var stöðugri því hann fékk sex fugla og aðeins einn skolla.
Hlynur Bergsson er í þriðja sæti á fjórum höggum undir pari og Íslandsmeistarinn Guðmundur Ágúst Kristjánsson og hinn efnilegi Dagbjartur Sigurbrandsson eru jafnir í fjórða sæti á þremur höggum undir pari.