Atvinnukylfingurinn Tiger Woods snýr aftur í næstu viku þegar hann tekur þátt á Memorial-mótinu í PGA-mótaröðinni en hann hefur ekkert keppt síðan í febrúar, vegna meiðsla og kórónuveirufaraldursins.
Fimm mót hafa farið fram á PGA-mótaröðinni síðan keppni hófst aftur eftir kórónuveiruna en Tiger hefur verið fjarri góðu gamni vegna meiðsla í baki. „Ég get ekki beðið eftir að byrja aftur. Ég hlakka til að keppa við strákana og mér líður vel,“ skrifaði Tiger á Twitter-síðuna sína en hann hefur unnið Memorial-mótið oftar en allir aðrir, fimm sinnum, síðast árið 2012.
Memorial-mótið er gjarnan sterkt og þar spilar inn í að gestgjafi mótsins er sjálfur Jack Nicklaus sem fær stjörnurnar til að mæta.