Guðmundur Ágúst Kristjánsson mun berjast meðal efstu manna á lokahring opna Euram Bank-mótsins í Austurríki sem er hluti af Evrópumótaröð karla í golfi. Annar hringurinn var spilaður í dag og lýkur mótinu á laugardaginn. Þrír Íslendingar taka þátt en tveir þeirra komust í gegnum niðurskurðinn.
Guðmundur er jafn í 8. sæti á samtals sjö höggum undir pari en hann lauk öðrum hring rétt í þessu, spilaði á 66 höggum eða fjórum undir pari sem er bæting um eitt högg frá fyrsta hringnum í gær. Hann fékk einn örn, fimm fugla og þrjá skolla á hringnum í dag en síðasti skollinn kom á 17. og næstsíðustu holunni. Guðmundur og Haraldur Franklín Magnús fara báðir í gegnum niðurskurðinn.
Haraldur spilaði hringinn á 66 höggum eða fjórum undir pari og er jafn í 33. sæti en tæplega 70 kylfingar komast áfram í gegnum niðurskurðinn og keppa á lokadeginum á morgun. Hann spilaði fyrsta hringinn á pari í gær en bætti sig töluvert í dag, spilaði á 66 höggum eða fjórum undir pari.
Andri Þór Björnsson er hins vegar úr leik en hann var hársbreidd frá því að komast áfram. Hann er jafn í 68. sæti og akkúrat fyrir neðan niðurskurðarlínuna en hann lék alls á einu höggi undir pari. Þriðji og næstsíðasti hringurinn fer fram á morgun.