Góðgerðarmótið skemmtilega, Einvígið á Nesinu, fór fram á Nesvellinum á Seltjarnarnesi í gær venju samkvæmt. Hert tilmæli sóttvarnalæknis settu þó sinn svip á mótshaldið því engir áhorfendur voru leyfðir í þetta skiptið.
Þeir hafa í gegnum árin myndað góða stemningu á mótinu. Meðal annars vegna þess að þeir kylfingar sem fá boð um að keppa á mótinu eru allir í sama ráshópi og áhorfendur því á sama stað en ekki dreifðir eins og alla jafna á golfmótum.
Hvað um það, snjallir kylfingar þáðu boð um að keppa og láta gott af sér leiða. Von, félag til styrktar skjólstæðingum gjörgæsludeildar E6 á Landspítalanum í Fossvogi, fær að njóta góðs af mótinu í ár. Er hún einnig kölluð Covid-deild Landspítalans. Í tilkynningu frá Nesklúbbnum kom fram ekki að hafi fundist styrktaraðili fyrir mótið í þetta sinn og er það visst áhyggjuefni. Í tilkynningunni kom fram að forráðamenn klúbbsins telja það einfaldlega tengjast því hversu viðkvæmt efnahagsástandið er þetta sumarið. Þess í stað voru einstaklingar og fyrirtæki hvött til að leggja málefninu lið með frjálsum framlögum.
Haraldur Franklín Magnús, úr Golfklúbbi Reykjavíkur, sigraði á mótinu og er það í fyrsta skipti sem hann sigrar á mótinu en Einvígið á Nesinu hefur verið haldið árlega frá árinu 1997.
Fyrir þá lesendur sem ekki þekkja þá er fyrirkomulagið óvenjulegt. Nesklúbburinn býður tíu snjöllum kylfingum að vera með. Eru þau öll í sama ráshópi og einn dettur út á hverri holu. Er gripið til bráðabana eftir hverja holu ef þörf er á að útkljá hver fellur úr keppni og þess vegna er mótið einnig kallað „shoot out“. Þá standa einungis tveir eftir á 9. teig og í þetta skiptið voru það Haraldur og félagi hans úr GR, Andri Þór Björnsson.
Jóhanna Lea Lúðvíksdóttir náði lengst þeirra þriggja kvenna sem voru í hópnum en hún féll úr keppni á 7. flötinni. Í 3. sæti hafnaði Hákon Örn Magnússon og GR-ingar náðu því fjórum efstu sætunum.
Úrslit:
1. sæti: Haraldur Franklín Magnús.
2. sæti: Andri Þór Björnsson.
3. sæti: Hákon Örn Magnússon.
4. sæti: Jóhanna Lea Lúðvíksdóttir.
5. sæti: Björgvin Sigurbergsson.
6. sæti: Bjarki Pétursson.
7. sæti: Guðrún Brá Björgvinsdóttir.
8. sæti: Ólafía Þórunn Kristinsdóttir.
9. sæti: Ólafur Björn Loftsson.
10. sæti: Axel Bóasson.