Íslandsmeistarinn Guðrún Brá Björgvinsdóttir fór vel af stað á Flumserberg Ladies Open-mótinu í Sviss. Er mótið hluti af LET Access-mótaröðinni.
Guðrún lék á 69 höggum eða þremur höggum undir pari og er í fimmta sæti ásamt nokkrum öðrum kylfingum, fjórum höggum frá Stina Resen frá Noregi sem er efst.
Guðrún fékk fimm fugla, tvo skolla og ellefu pör á holunum átján. Verður annar hringurinn leikinn á morgun. Ólafía Þórunn Kristinsdóttir er ekki á meðal keppenda að þessu sinni, en hún keppti á síðasta móti mótaraðarinnar.