Íslandsmeistarinn Guðrún Brá Björgvinsdóttir féll niður um átta sæti á milli hringja á Flumserberg Ladies Open-mótinu í Sviss. Er mótið hluti af LET Access-mótaröðinni.
Guðrún lék annan hring mótsins í dag á 72 höggum, eða á pari, og er samtals á þremur höggum undir pari eftir afar góðan hring í gær. Hringurinn hjá Guðrúnu var skrautlegur og fékk hún fimm fugla og fimm skolla.
Er hún í 13. sæti og fór auðveldlega í gegnum niðurskurðinn. Verður þriðji hringurinn leikinn á morgun og sá fjórði og síðasti á sunnudag.