Mun betra skor en búist var við

Bandaríkjamaðurinn Justin Thomas er efstur að loknum fyrsta keppnisdegi á Opna bandaríska meistaramótinu í golfi sem fram fer á Winged Foot í New York. 

Thomas lék á 65 höggum sem er fimm högg undir pari vallarins sem þykir mjög erfiður og var ekki búist við svo góðu skori. Höggi á eftir eru Bandaríkjamennirnir Patrick Reed og Matthew Wolff ásamt Thomas Pieters frá Belgíu. 

Frétt af mbl.is

Hola í höggi á fyrsta keppnisdegi

Winged Foot var síðast vettvangur Opna bandaríska árið 2006 og er því orðið nokkuð síðan. Margir af snjöllustu kylfingum heims eru að takast á við völlinn í fyrsta skipti eins og Dustin Johnson, Rory McIlroy og fleiri. Árið 2006 sigraði Geoff Ogilvy á fimm höggum yfir pari. Mótsins er minnst fyrir það að Phil Mickelson og Colin Montgomerie fengu báðir 6 á lokaholunni þegar þeir hefðu getað farið upp fyrir Ogilvy eða jafnað við hann. 

Einnig var búist við því að mótið í ár myndi vinnast á höggafjölda yfir pari og margir sérfræðingar telja að það geti enn orðið raunin þótt skorið hafi verið betra en búist var við í dag. Flatirnar eru erfiðar sem og karginn ef menn hitta ekki brautir. Vindurinn blés ekki að ráði í dag og talið er að skorið muni hækka hratt ef það bætir í vindinn næstu daga. 

Þrír skemmtilegir kylfingar eru á þremur undir pari. Norður Írinn Rory McIlroy, Englendingurinn Lee Westwood og Louis Oosthuizen frá Suður-Afríku. Westwood lætur sig enn dreyma um að ná sigri á risamóti en er í hópi snjöllustu kylfinga sögunnar sem ekki hafa náð því. McIlroy varð faðir í fyrsta sinn á dögunum og óljóst þótti hversu einbeittur hann yrði í mótinu og byrjaði hann líklega betur en búist var við. 

Dustin Johnson átti í erfiðleikum á Winged Foot í kvöld. AFP

Efstu kylfingar heimslistans Dustin Johnson frá Bandaríkjunum og Spánverjinn Jon Rahm eru ekki á meðal efstu manna en Rahm vegnaði þó mun betur. Hann lék á höggi undir pari en Johnson á þremur yfir pari. 

Aðrir valdir kylfingar: 

Xander Schauffele -2

Bryson DeChambeau -1

Tony Finau -1

Rickie Fowler -1

Hideki Matsuyama +1

Webb Simpson +1

Jason Day +2

Jordan Spieth +3

Tiger Woods +3

Justin Rose +3

Gary Woodland +4

Tommy Fleetwood +4

Collin Morikawa +6

Shane Lowry +6

Phil Mickelson +9

Ætlar Lee Westwood að blanda sér í baráttuna? AFP

• Blogga um frétt