Ekki tókst að ljúka þriðja hring á Opna portúgalska mótinu í golfi vegna myrkurs en mótið er liður í Evrópumótaröðinni, þeirri sterkustu í Evrópu. Þeir Guðmundur Ágúst Kristjánsson og Haraldur Franklín Magnús eru á meðal kylfinga á mótinu.
Guðmundur Ágúst er í 28. sæti ásamt nokkrum öðrum kylfingum á þremur höggum undir pari en hann náði aðeins að leika sex holur í dag, áður en keppni var frestað til morguns. Þurfti að klára annan hring í dag, þar sem honum var frestað vegna veðurs í gær.
Haraldur Franklín Magnús er úr leik, en hann lék tvo hringi á 150 höggum, sex höggum yfir pari, og komst ekki í gegnum niðurskurðinn. Verður þriðji hringur kláraður á morgun, sem og fjórði og síðasti hringurinn.