Bandaríski kylfingurinn Amy Olson gerði sér lítið fyrir og fór holu í höggi á Opna bandaríska meistaramótinu í golfi sem fram fer á Cypress Creek og Jackrabbit-völlunum í Houston í Bandaríkjunum þessa dagana.
Mótið er hluti af LPGA-mótaröðinni, þeirri sterkustu í heimi, en Olson er með eins höggs forystu á mótinu eftir fyrsta keppnisdaginn sem fór fram í gær.
Hún lék á 67 höggum og var á samtals fjórum höggum undir pari en þær Lim Kim frá Suður-Kóreu, Moriya Jutanugarn frá Taílandi og Hinako Shibuno frá Japan fylgja fast á hæla hennar á þremur höggum undir pari.
Olson fór holu í höggi á sextándu holu vallarins en það er par þrjú hola. Hún er 28 ára gömul en hefur verið keppandi í LPGA-mótaröðinni undanfarin átta ár.
Hún bíður enn þá eftir sínum fyrsta sigri á stórmóti en Opna bandaríska meistaramótinu lýkur á sunnudaginn kemur.
🚨 ACE ALERT! 🚨@AmyOlsonGolf hits a perfect shot at the @uswomensopen!
— LPGA (@LPGA) December 10, 2020
Watch now on @GolfChannel!pic.twitter.com/Q6jCR06ZgR