Bandaríkjamaðurinn Patrick Cantlay hélt sjó í gær þegar lokamót PGA-mótaraðarinnar í golfi hófst á East Lake vellinum í Georgíuríki í Bandaríkjunum.
Eins og lesa má um í meðfylgjandi frétt þá er fyrirkomulag lokamótsins, The Tour Championship, með öðru sniði en vanalega. Kylfingarnir hefja ekki leik jafnir heldur eru menn verðlaunaðir fyrir árangur sinn á árinu.
Cantlay hóf keppni á 10 undir pari og með tveggja högga forskot. Eftir að hafa leikið á þremur undir pari er hann því á 13 undir pari. Spánverjinn Jon Rahm er tveimur höggum á eftir en Rahm sigraði í sumar á Opna bandaríska meistaramótinu.
Harris English og Bryson DeChambeau eru á 8 undir pari en aðrir þurfa að hafa sig alla við til að missa ekki Cantlay og Rahm of langt fram úr sér.