Sílemaðurinn Mito Pereira er óvænt með þriggja högga forystu eftir þrjá hringi á PGA meistaramótinu í golfi sem nú stendur yfir í Tulsa í Oklahoma. Pereira hefur aðeins einu sinni áður keppt á risamóti og aldrei komist í gegnum niðurskurðinn.
Pereira er á níu höggum undir pari eftir þrjá hringi en hann lék hringinn í kvöld á 69 höggum, einu höggi undir pari. Englendingurinn Matthew Fitzpatrick og Bandaríkjamaðurinn Will Zalatoris, sem var í forystu eftir tvo hringi, eru jafnir á eftir Pereira á sex höggum undir pari. Zalatoris átti sinn versta hring á mótinu til þessa og lék á 73 höggum.
Norður-Írinn Rory McIlroy, sem var í forystu eftir fyrsta hring, átti einnig sinn versta hring í dag og lék á 74 höggum. Hann er fallinn niður í 17. sæti og er á parinu.
Tiger Woods átti einnig erfitt uppdráttar og lék á 79 höggum. Hann er neðstur af þeim sem fóru í gegnum niðurskurðinn á níu höggum yfir pari.
Fjórði og síðasti hringur mótsins verður leikinn annað kvöld.