Trump og Musk gætu bjargað golfinu

Norðurírski kylfingurinn Rory McIlroy telur að kjör Donalds Trumps sem Bandaríkjaforseta, með stuðningi auðjöfursins Elons Musks, gæti hjálpað til við að greiða úr deilu PGA-mótaraðarinnar og LIV-mótaraðarinnar, golfíþróttinni til hagsbóta.

Mótaraðirnar tvær hafa beitt sér fyrir því að laða að sér bestu kylfinga heims. PGA-mótaröðin hefur í áranna rás gengið að því sem vísu á meðan LIV-mótaröðin hefur í krafti gífurlegs fjármagns frá Sádi-Arabíu tekist að lokka marga af þeim bestu yfir til sín á undanförnum árum.

McIlroy hefur verið afar gagnrýninn á LIV-mótaröðina en virðist farið að leiðast þófið og vill eins og flestir fá niðurstöðu í málið, þar sem einhvers konar sameining þætti æskilegust. Viðræður um slíkt hafa engan ávöxt borið.

Með gáfaðasta mann heims sér við hlið

Trump lét þau ummæli falla á dögunum að hann geti leyst málið á stundarfjórðungi.

„Hann gæti gert það. Hann er með Elon Musk, sem ég tel vera gáfaðasta mann heims, sér við hlið. Við gætum gert eitthvað í þessu ef við getum fengið Musk með okkur í þetta.

Ég held að ef við skoðum þetta utan frá er þetta líklega ekki jafn flókið og raunin er.  Trump á augljóslega gott samband við Sádi-Arabíu. Hann á í góðu sambandi við golf, hann elskar golf. Þannig að það gæti verið, hver veit?“ sagði McIlroy á fréttamannafundi í síðustu viku.

Tæki mig um 15 mínútur

Í hlaðvarpsþættinum Let‘s Go! sagði Trump á sunnudaginn í þarsíðustu viku, tveimur dögum áður en hann var kjörinn:

„Ég gæti örugglega komið því í kring. Ég myndi segja að það tæki mig um 15 mínútur að klára þann samning. Svo ég sé hreinskilinn er ég í raun og veru að fara að vinna að öðrum hlutum.

Ég tel okkur standa frammi fyrir miklu stærri vandamálum en þetta. En ég er á þeirri skoðun að við ættum að vera með eina mótaröð og að allir bestu kylfingarnir séu hluti af henni.“

• Blogga um frétt