Þessi endalausu öskur eru of mikið af því góða

Þótt ég sé rúmum tveimur áratugum yngri en ­höfundur þess ljósvaka er ég mjög sammála. Lætin í útsendingunni voru hálffáránleg. Ríkharð Óskar Guðnason missti sig nokkrum sinnum í öskrunum meðan á lokakaflanum stóð.

Vissulega var spennan mikil, dramatíkin ekki minni og Rory McIlroy vann sögulegan sigur. Hann kastaði frá sér góðri stöðu en bjargaði sér að lokum. Það þýðir samt ekki að áhorfendur vilji endilega hlýða á mikil og löng öskur.

Höfundur þessa bakvarðar er mikill aðdáandi Stöðvar 2 sport og þeirrar glæsilegu dagskrár sem stöðin býður upp á. Stjórnendur hennar eiga mikið hrós skilið fyrir sitt framlag í garð íþróttanna á Íslandi.

Þessi endalausu öskur eru hins vegar of mikið af því góða. Lenskan í lýsingum í körfubolta er orðin hin furðulegasta. Menn keppast við að öskra, gefa frá sér skrítin hljóð og vera fyndnir. Sumir lýsendur gjörsamlega tapa sér síðan þegar skorað er mark í fótboltaleikjunum.

Bakvörðurinn í heild sinni er á íþróttasíðum Morgunblaðsins í dag.