Gerði góða atlögu að US Open

Kylfingurinn efnilegi Gunnlaugur Árni Sveinsson gerði harða atrennu að því að komast á US Open, eitt af risamótunum fjórum í golfinu, á Bent Tree vellinum í Dallas í Texas í dag.

Gunnlaugur tók þátt í lokaúrtökumóti fyrir risamótið þar sem 86 kylfingar börðust um sjö laus sæti og spiluðu tvo heila hringi í dag, 36 holur.

Gunnlaugur lék frábærlega á fyrri hringnum, var á fimm höggum undir pari og var á tímabili í öðru sæti, og var í hópi sjö efstu þegar seinni hringurinn hófst.

Þar gekk honum ekki eins vel, lék á tveimur höggum yfir pari og var í 30 sæti þegar hann lauk keppni en nokkuð margir kylfingar eiga enn eftir að ljúka seinni hringnum. Gunnlaugur er fjórum höggum frá sjöunda sætinu eins og  staðan er núna.

• Blogga um frétt