Sanngjarnt jafntefli á Nesinu

Bjarni Ófeigur Valdimarsson, Gróttu, sækir að marki ÍR en Kristján ...
Bjarni Ófeigur Valdimarsson, Gróttu, sækir að marki ÍR en Kristján Orri Jóhannsson er til varnar. mbl.is/Hanna Andrésdóttir

Grótta og ÍR gerðu sanngjarnt 26:26-jafntefli er liðin mættust í 13. umferð Olísdeildar karla í handbolta í dag. Liðin skiptust á að hafa forystu og tókst hvorugu liðinu að tryggja sér sigur, þrátt fyrir tækifæri til þess í lokin. 

Grótta fór betur af stað og komst í 3:1 og 6:3 á fyrstu mínútum leiksins. Sóknarleikur heimamanna gekk mjög vel á meðan gestirnir áttu erfitt með að koma boltanum framhjá Hreiðari Levý Guðmundssyni í markinu.

ÍR náði hins vegar fínum kafla um miðbik hálfleiksins og komst að lokum yfir í fyrsta skipti, 9:8. Eftir það var mikið jafnræði með liðunum og var staðan 12:12 þegar skammt var eftir af fyrri hálfleik. Staðan í hálfleik var 15:14, Gróttu í vil. Fyrri hálfleikurinn var hraður og skemmtilegur og bæði lið ætluðu sér að keyra hvort á annað.

Grótta fór mun betur af stað í seinni hálfleik og var ÍR-ingum fyrirmunað að skora í upphafi hans. Hreiðar Levý komst í gang og varði m.a tvö vítaköst á fyrstu mínútum hálfleiksins. Fyrsta mark ÍR í hálfleiknum kom á áttundu mínútu hans í stöðunni 19:14. ÍR minnkaði þá muninn í 19:17 í kjölfarið og virtist leikurinn ætla að verða spennandi á ný.

ÍR náði svo að jafna í 21:21, tíu mínútum fyrir leikslok og voru síðustu tíu mínútur leiksins spennuþrungnar og liðin skiptust á að hafa eins marks forystu. Staðan var 26:26 þegar 40 sekúndur voru eftir og ÍR með boltann. Gestirnir náðu hins vegar ekki að koma skoti á markið og Grótta fékk hann, sex sekúndum fyrir leikslok, en það reyndist of skammur tími og liðin sættust á jafntefli. 

Grótta 26:26 ÍR opna loka
60. mín. Leik lokið Tíminn reyndist of skammur fyrir Gróttu. Jafntefli er niðurstaðan.
mbl.is