Rúnar Kárason, landsliðsmaður í handknattleik, lék ekki með liði sínu Hannover-Burgdorf sem tapaði 29:26 fyrir Wetzlar á útivelli í 1. deildinni í dag. Rúnar tjáði mbl.is að meiðslin væru minniháttar.
Rúnar meiddist í kálfa en segir meiðslin ekki vera alvarleg. Ekki hafi þótt ástæða til að taka áhættu og láta hann spila í dag.
Rúnar býst við því að geta æft þegar líður á vikuna og fyrstu landsleikirnir undir stjórn Guðmundar Guðmundssonar í þessari atrennu ættu því ekki að vera í hættu hjá Rúnari ef fram heldur sem horfir. Landsliðið leikur á fjögurra liða móti í Noregi 5.-9. apríl.