Aron Pálmarsson og félagar hans í Barcelona eru einum sigri frá því að tryggja sér Spánarmeistaratitilinn í handknattleik.
Barcelona burstaði Cangas á heimavelli sínum í gærkvöld, 36:21. Aron skoraði 2 mörk í leiknum en hornamaðurinn Valero Rivera fór á kostum og skoraði 13 mörk.
Þegar sjö umferðir eru eftir af deildinni er Barcelona með 12 stiga forskot á Ademar Leon og með sigri gegn Cuenca í næstu viku tryggja Börsungar sér Spánarmeistaratitilinn í 25. sinn og áttunda árið í röð.
Aron og samherjar hans verða næst í eldlínunni á sunnudaginn en þá sækja þeir franska liðið Montpellier heim í fyrri viðureign liðanna í 16-liða úrslitum Meistaradeildarinnar.