ÍBV mætir Turda í undanúrslitum

Eyjamenn eru á leiðinni til Rúmeníu.
Eyjamenn eru á leiðinni til Rúmeníu. mbl.is/Árni Sæberg

ÍBV mætir Potaissa Turda frá Rúmeníu í undanúrslitum Áskorendakeppni Evrópu í handknattleik en það varð ljóst nú í dag.

Eyjamenn slógu út Krasnod­ar í 8-liða úrslitunum með sannfærandi sigrum, samanlagt 66:51. Turda sló út norska liðið Fyllingen fyrr í dag en einvíginu lauk samanlagt 59:56.

Rúmenska liðið er mörgum Íslendingum kunnugt enda mætti það Val á sama stigi keppninnar í fyrra í afar umdeildu einvígi. Valsmenn unnu þá stórt á Hlíðarenda en töpuðu einvíginu með einu marki eftir níu marka tap í Rúmeníu í ótrúlegum leik þar sem dómararnir stálu sviðsljósinu.

Arnar Pétursson, þjálfari ÍBV, sagði í viðtali við mbl.is eftir síðari leikinn gegn Krasnodar að óskamótherji hans í undanúrslitum væri Turda svo Eyjamenn gætu reynt að „hefna fyrir Valsarana,“ en hann hefur fengið ósk sína uppfyllta.

mbl.is
Fleira áhugavert
Fleira áhugavert