Í annað sinn á einu ári eru leikmenn rúmenska liðsins Potaissa Turda mættir til Íslands til þess að mæta íslensku félagsliði í undanúrslitum Áskorendakeppni Evrópu.
Síðast léku þeir við Valsmenn en að þessu sinni eru leikmenn Turda komnir til Vestmannaeyja hvar þeir mæta ÍBV í dag klukkan 15 í íþróttamiðstöðinni.
Mörgum eru e.t.v. í fersku minni viðureignir Vals og Turda í fyrra, ekki síst síðari leikurinn en hann dró dilk á eftir sér. Valur vann fyrri viðureignina í Valshöllinni, 30:23, en tapaði síðari leiknum í Turda með níu marka mun, 32:23. Dómarar síðari leiksins léku stórt hlutverk og drógu verulega taum heimamanna og eftirlitsmaðurinn virtist vera á sömu bylgjulengd.
Valsmenn lögðu inn kvörtun til Handknattleikssambands Evrópu ásamt slakri upptöku af leiknum, sem unnin var af heimamönnum í Turda. Eins og stundum áður komust Valsmenn ekkert áfram með sitt mál. Úrslitin stóðu. Turda lék til úrslita og steinlá í tveimur leikjum fyrir Sporting frá Portúgal með 15 marka mun.
Sjá forspjall um leikinn í íþróttablaði Morgunblaðsins í dag.