Hornamaðurinn Stefán Rafn Sigurmannsson fær nú aftur tækifæri með landsliðinu í mótsleik eftir afar góða frammistöðu í Ungverjalandi í vetur og leikur í dag sinn 60. landsleik. Stefán Rafn var ekki með landsliðinu á síðustu tveimur stórmótum.
„Ég fékk smá pásu frá landsliðinu og saknaði þess auðvitað að spila landsleiki. Ég er virkilega spenntur og hef notið þess að taka þátt í undirbúningnum. Maður vill alltaf vera með í landsleikjum og það er mikill heiður að spila fyrir Ísland. Landsliðsþjálfarinn sem þá stýrði liðinu valdi annan leikmann og það er bara eins og gengur og gerist í boltanum. Mér hefur gengið hrikalega vel í vetur. Ég tel að ég sé kominn á góðan stað en er þó enn að bæta mig. Upp á síðkastið hefur mér gengið vel og ég er vel undirbúinn fyrir þetta verkefni,“ sagði Stefán þegar Morgunblaðið tók hann tali.
Nánar er rætt við Stefán Rafn í íþróttablaði Morgunblaðsins sem kom út í morgun.
Ísland mætir Litháen í Vilnius í dag klukkan 16 að íslenskum tíma í undankeppni HM í handknattleik karla. Fylgst verður með leiknum í beinni textalýsingu á mbl.is úr Siemens Arena í Vilnius.