Noregur sigraði Sviss, 32:26, í fyrri leik liðanna í undankeppni heimsmeistaramótsins í handknattleik sem fram fer í Danmörku og Þýskalandi á næsta ári.
Yfirburðir Norðmanna voru miklir strax frá upphafi og voru þeir átta mörkum yfir í hálfleik, 19:11. Sander Sagosen var manna bestur í liði Noregs, skoraði tíu mörk, en liðið gaf aðeins eftir í síðari hálfleik.
Króatía rótburstaði Svartfjallaland 32:19 í fyrri leik liðanna í Króatíu og Ungverjar unnu fimm marka útisigur, 29:24, á Slóveníu.
Síðari leikir liðanna fara fram á þriðjudag og miðvikudag í næstu viku.