Íslenska landsliðið í handbolta skipað leikmönnum 18 ára og yngri vann flottan 28:24-sigur á Slóveníu í þriðja leik sínum á EM í Króatíu í dag. Ísland er þar með með fullt hús stiga eftir þrjá leiki.
Íslenska liðið hafði yfirhöndina frá fyrstu mínútu og var komið í sjö marka forystu í hálfleik, 15:8. Haukur Þrastarson var frábær í leiknum, skoraði 12 mörk og var valinn maður leiksins.
Ísland vinnur því D-riðil af miklu öryggi og fer í milliriðil með tveimur efstu liðum C-riðils en ekki liggur enn fyrir hver þau verða. Þjóðverjar og Spánverjar eru efstir þar en leikir riðilsins verða spilaðir síðar í dag. Með Íslandi fer Svíþjóð áfram úr D-riðli.