„Við vorum ekki nógu góðir til að vinna leikinn,“ sagði Alfreð Gíslason, þjálfari þýska handboltaliðsins Kiel, í samtali við Sky í Þýskalandi eftir 35:30-tap fyrir Magdeburg á útivelli í gærkvöldi.
Kiel fór ágætlega af stað í þýsku A-deildinni og vann tvo fyrstu leiki sína. Síðan þá hafa ósigrar á móti Flensburg og Magdeburg hins vegar litið dagsins ljós. Kiel var spáð Þýskalandsmeistaratitlinum af mörgum sérfræðingum fyrir mót og hefur byrjunin því í heild verið vonbrigði.
„Við höfum mætt Flensburg og Magdeburg á tveimur af erfiðustu útileikjum tímabilsins. Við höldum áfram að leggja hart að okkur til að laga það sem laga þarf, til þess þurfum við smá þolinmæði frá stuðningsmönnum,“ sagði Alfreð.