Vorum fljótir aftur á beinu brautina

„Ég er ánægður með hvernig við mættum í þetta verkefni, við mættum tilbúnir,“ sagði Gunnar Magnússon, þjálfari Hauka, í samtali við mbl.is eftir sannfærandi 31:22-sigur á Gróttu í Olísdeild karla í handbolta í kvöld. 

„Við vissum að Gróttuliðið er drulluerfitt og ef við mætum ekki klárir í þetta þá refsa þeir. Ég er ánægður með hugarfarið, við mættum eins og fagmenn hérna og gerðum þetta vel. Við náðum tökum á leiknum og héldum þeim út allan tímann.“

Gróttumenn minnkuðu muninn í þrjú mörk í síðari hálfleik með þremur mörkum í röð en þá sögðu Haukar hingað og ekki lengra. 

„Ég sagði við strákana í hálfleik að um leið og við slökum á þá refsa þeir. Það kom smá hiksti í stuttan tíma, en við vorum fljótir aftur á beinu brautina og vorum á fullu í 60 mínútur.“

Haukar jöfnuðu toppliðin Val, Selfoss og FH á stigum með sigrinum. 

„Við verðum að halda áfram að safna stigum og koma inn í hverja viku og sýna frammistöðu eins í dag. Ef við erum ekki 100 prósent þá töpum við stigum. Við verðum að halda áfram að bæta okkur og berjast fyrir stigunum. Þetta er langhlaup,“ sagði Gunnar Magnússon. 

• Blogga um frétt