Selfyssingurinn Teitur Örn Einarsson átti afar góðan leik fyrir Kristianstad í 26:23-sigri á Ystad á heimavelli í efstu deild Svíþjóðar í handbolta í kvöld. Teitur skoraði níu mörk og var markahæstur á vellinum.
Ólafur Andrés Guðmundsson bætti við einu marki fyrir Kristianstad en Arnar Freyr Arnarsson komst ekki á blað. Kristianstad er í toppsætinu með 18 stig, þremur meira en Alingsås sem er í öðru sæti.
Ágúst Elí Björgvinsson varði níu skot í marki Sävehof í 38:32-tapi fyrir Alingsås á útivelli. Sävehof er í áttunda sæti deildarinnar, en það sæti gefur þátttökurétt í úrslitakeppninni að lokinni deildarkeppninni.