Íslendingar sáu um fjórðung markanna í viðureign West Wien og Schwaz þegar liðin áttust við í austurrísku A-deildinni í handknattleik í Vínarborg í kvöld.
West Wien var yfir rétt fyrir leikslok, 24:22, en Schwaz knúði fram jafntefli með því að skora tvö síðustu mörkin.
Viggó Kristjánsson skoraði 4 mörk fyrir West Wien, sem Hannes Jón Jónsson þjálfar, Ólafur Bjarki Ragnarsson gerði 3 mörk og Guðmundur Hólmar Helgason 3. Fyrir Schwaz skoraði Ísak Rafnsson 2 mörk.
Liðin eru um miðja deildina en West Wien er með 12 stig í fimmta sæti af tíu liðum og Schwaz er í sjötta sæti með 11 stig.