Díana Dögg Magnúsdóttir kunni vel við sig í sjávarloftinu á bernskuslóðunum í Vestamannaeyjum á mánudagskvöldið þegar hún kom þangað með samherjum sínum í handknattleiksliði Vals. Díana Dögg fór á kostum og skoraði m.a. 10 mörk í 13 marka sigri Vals, 29:16, sem hélt þar með efsta sæti Olís-deildar kvenna.
„Loksins hitti ég á leik þar sem skotin mín hittu markið. Því miður hefur svo ekki verið í nokkrum leikjum hjá mér á keppnistímabilinu,“ sagði Díana Dögg þegar slegið var á þráðinn til hennar í gær. „Auk þess er alltaf gott að koma heim og spila og hafa fjölskylduna á vellinum,“ sagði Díana Dögg og tók undir með blaðamanni að sjávarloftið væri ævinlega hressandi og endurnærandi.
Yfirburðir Valsliðsins í leiknum í Eyjum komu á óvart. Lið ÍBV er vel skipað auk þess að vera þekkt fyrir að vera erfitt heim að sækja. „Við áttum von á leikmönnum ÍBV kolbrjáluðum í leikinn. En okkur tókst að slá á stemninguna hjá þeim snemma leiks og ná góðu forskoti í upphafi. Varnarleikur okkar var frábær og sóknarleikurinn framúrskarandi. Við uppskárum eins og til var sáð,“ sagði Díana Dögg sem er 21 árs.
Díana Dögg segir Valsliðið hafa sótt jafnt og þétt í sig veðrið á leiktíðinni. Varnarleikurinn og markvarslan hafi verið góð nánast frá upphafi en sinn tíma hafi tekið að koma sóknarleiknum í réttan farveg. „Við spilum okkur sífellt betur saman eftir talsverðar breytingar á leikmannahópnum frá síðasta keppnistímabili. Það hefur tekið sinn tíma að spila liðið saman í sókninni en mér sýnist hann fara batnandi með hverjum leik,“ sagði Díana Dögg.
Nánar er rætt við Díönu í íþróttablaði Morgunblaðsins sem kom út í morgun og þar er birt úrvalslið Morgunblaðsins úr 15. umferð Olísdeildar kvenna.