Handknattleikslið Vals verður án tveggja af sínum bestu mönnum næstu vikurnar en þeir Agnar Smári Jónsson og Róbert Aron Hostert eru meiddir og verða að líkindum ekki með um bikarhelgina í Laugardalshöll 8.-9. mars.
Þetta kemur fram á vef RÚV í dag þar sem Snorri Steinn Guðjónsson, þjálfari Vals, staðfestir meiðsli leikmannanna. Róbert Aron er með sprungu í beini fyrir neðan auga og fór í aðgerð af þeim sökum en Agnar Smári er meiddur í baki og með vísi að brjósklosi, að sögn Snorra. Líklegt er að þeir verði frá keppni í sex vikur að því er segir á vef RÚV.
Valur var án beggja leikmanna þegar liðið sló út Selfoss í Coca Cola-bikarnum í fyrrakvöld en með því tryggði liðið sér sæti í undanúrslitunum í Laugardalshöll 8. mars.