Alþjóða handknattleikssambandið, IHF, hefur birt fyrstu hugmyndir sínar til þess að koma til móts við handknattleiksfólk vegna kröfu þess um að dregið verði úr álagi á heimsmeistaramótum.
Hvergi er þó minnst á í hugmyndum IHF að lengri tími líði á milli leikja á mótum, en það er ein helsta krafa leikmanna.
Hugmyndir IHF snúa að næsta heimsmeistaramóti karla sem fram fer í Egyptalandi 2021. Fyrir nokkru hefur verið ákveðið að fjölga þátttökuþjóðum úr 24 í 32. Samkvæmt hugmyndum að leikskipulagi mótsins myndi leikjum þeirra liða sem leika til verðlauna fækka um einn, úr tíu í níu. Tímaramminn frá upphafi til enda mótsins yrði áfram sá sami, þ.e. 17 dagar.
Einnig hefur IHF varpað fram þeirri hugmynd að þjálfarar velji 35 leikmenn í hópa sína í stað 28 og að heimilt verði að hafa 18 leikmenn í hverjum leikmannahópi á mótum í stað 16. Um leið verði heimilt að skipta fimm leikmönnum inn og úr 18 manna hópnum á meðan á mótinu stendur í stað þriggja leikmanna eins og verið hefur undanfarin ár.
Sjá alla greinina á íþróttasíðum Morgunblaðsins í dag