Rúnar Sigtryggsson, þjálfari Stjörnunnar, er spenntur fyrir því að mæta deildarmeisturum Hauka í átta liða úrslitum Íslandsmóts karla í handbolta.
Fyrsti leikurinn fer fram í Schenker-höllinni í Hafnarfirði klukkan 14.00 á laugardaginn. Stjarnan hafnaði í áttunda sætinu í vetur með 18 stig, sextán stigum minna en Hafnarfjarðarliðið.
Þjálfarinn staðfesti að Egill Magnússon verði ekkert með Stjörnunni í úrslitakeppninni vegna meiðsla og svo hefur Bjarki Már Gunnarsson einnig verið að glíma við meiðsli.
„Stemningin hjá okkur er ágæt. Við erum ánægðir að fá að vera með í úrslitakeppninni. Við höfum reynt að hvíla menn sem hafa verið lemstraðir, svo við fáum sem mest út úr þeim þegar þetta byrjar á laugardaginn.
Egill fór í aðgerð og verður ekkert meira með. Bjarki hefur hvílt síðan við spiluðum á móti ÍR og mun væntanlega koma inn á æfingu tveimur dögum fyrir leik. Hann verður með en það er bara spurning hversu góður hann verður," sagði Rúnar.
Haukar unnu Stjörnuna tvisvar í deildinni í vetur. Stjarnan átti hins vegar fína möguleika á sigri, sérstaklega á heimavelli sínum, en Haukar unnu að lokum 29:28.
„Við gáfum þeim tvo hörkuleiki í vetur en þá var Egill með hátt í 20 mörk fyrir okkur. Það vantar þau í þessa leiki. Við áttum góða kafla en við unnum ekki leikina. Núna er kannski kominn tími á okkur. Mörkin verða að dreifast á allt liðið, einn maður getur ekki tekið eins mörg skot og Egill tekur."
Rúnar gat ekki nefnt sérstaka veikleika í liði deildarmeistaranna og veit að mjög erfitt verkefni er fram undan.
„Haukar eru með góðan mannskap og eru þéttir fyrir. Þeir hafa bætt í eftir því sem liðið hefur á tímabilið og þeir voru mjög sterkir á lokakaflanum. Menn voru að tala um að þeir ættu erfiðasta prógramið eftir af toppliðunum þegar skammt var eftir og þeir voru samt bestir og kláruðu þetta með sæmd," sagði Rúnar.