Fimmta sæti eftir sigur á Grikkjum

Ísland hafnaði í fimmta sæti í B-deild Evrópumeistaramóts kvenna í handbolta U19 ára í Búlgaríu. Ísland vann 29:22-sigur á Grikklandi í lokaleik sínum á mótinu í dag, en liðið vann Finnland í gær og tryggði sér leikinn um fimmta sætið. 

Grikkland byrjaði betur og komst í 5:3, en þá skoraði íslenska liðið sjö mörk í röð og komst í 10:5. Staðan í hálfleik var 18:12 og hélt íslenska liðið fínni forystu allan seinni hálfleikinn og vann að lokum öruggan sigur. 

Berta Rut Harðardóttir var markahæst í íslenska liðinu með sex mörk, Erna Guðlaug Gunnarsdóttir og Birta Rún Grétarsdóttir skoruðu fjögur og þær Anna Hansdóttir, Katla María Magnúsdóttir og Tinna Sól Björgvinsdóttir skoruðu þrjú mörk hver. 

• Blogga um frétt