Haukar eru komnir upp úr fallsæti í Inkasso-deild karla í fótbolta eftir 1:1-jafntefli við Aftureldingu í fallbaráttuslag á Ásvöllum í kvöld.
Spánverjinn David Eugenio kom Aftureldingu yfir strax á annarri mínútu en Aron Freyr Róbertsson jafnaði fyrir Hauka á 23. mínútu og þar við sat.
Jafnteflið nægði Haukum til að fara upp fyrir Magna og senda Grenivíkurliðið í fallsæti. Afturelding er í 9. sæti með 18 stig, tveimur stigum meira en Haukar og Magni.
Haukar eru með betri markatölu en Magnamenn, en Magni á leik til góða gegn Njarðvík á laugardaginn kemur. Njarðvík rekur lestina með 11 stig.