Markvörðurinn Ágúst Elí Björgvinsson og félagar hans í sænska meistaraliðinu Sävehof hófu riðlakeppni Meistaradeildar Evrópu í handknattleik með útisigri gegn finnska liðinu Cocks í dag 30:25.
Liðin leika í C-riðli Meistaradeildarinnar. Sænsku meistararnir voru skrefinu á undan allan tímann en staðan í hálfleik var 18:13 og mestur var munurinn sjö mörk í seinni hálfleik.
Ágúst Elí er á sínu öðru tímabili með Sävehof en hann kom til liðsins frá FH fyrir síðasta tímabil og á sínu fyrsta ári varð hann sænskur meistari með því.