Kristinn Guðmundsson, annar af þjálfurum karlaliðs ÍBV í handknattleik, gæti átt yfir höfði sér refsingu en samkvæmt heimildum mbl.is hefur Róbert Geir Gíslason, framkvæmdastjóri HSÍ, sent ummæli sem höfð voru eftir Kristni eftir tap ÍBV gegn Aftureldingu í fyrrakvöld til aganefndar HSÍ.
Eyjamenn voru óhressir með dómara leiksins og eftir hann tók enginn leikmaður ÍBV né þjálfarar liðsins í höndina á dómurunum. Spurður út í það sagði Kristinn í viðtali við mbl.is:
„Það er ekkert óeðlilegt miðað við þeirra frammistöðu í þessum leik, ég er búinn að segja það áður við þá sem sjá um dómaramálin hjá HSÍ að þetta par sé það allra slakasta sem boðið er upp á í þessari deild. Sérstaklega annar dómarinn sem er gjörsamlega út úr kú í dómgæslunni sinni, hann á þrjá, fjóra eða fimm dóma á okkur sem eru allir vafasamir á síðustu mínútunum.
Ég get ekki gert meiri kröfur á þá en það, við vildum sýna fram á það að við værum ósáttir, við fórum fyrst og fremst í burtu til þess að vera ekki að segja einhverja djöfulsins vitleysu. Það var miklu frekar það heldur en það að vilja ekki klára einhver atriði með að taka í höndina á einhverjum, ég held að það sé minna atriði. Meira atriðið var það að við vildum ekki að menn myndu missa einhvern djöfulinn út úr sér sem myndi svo kosta þá í næstu leikjum.“