Danir eru aðeins með eitt stig eftir tvo leiki á EM karla í handbolta. Danska liðið tapaði fyrir Íslandi í fyrsta leik og var svo heppið að ná jafntefli við Ungverjaland í dag.
Danska pressan er allt annað en sátt við frammistöðu liðsins til þessa, en Danir verða að treysta á að Ísland vinni Ungverjaland á miðvikudag til að eiga einhvern möguleika á að komast áfram í milliriðla.
Blaðamaður Berlingske skefur ekki af hlutunum og segir Dani hafa gert sig að fíflum á mótinu til þessa. Á sama tíma biðlar hann til Íslands um að koma stóra bróður til aðstoðar og vinna Ungverja.
Ekstrabladet hefur ekki sérstaklega mikla trú á að Ísland vinni Ungverjaland í síðasta leik og það sé erfitt að treysta á íslenska liðið.
BT þurfti aðeins eitt orð til að lýsa sínu áliti á frammistöðu danska liðsins til þessa. „Vandræðalegt, vandræðalegt, vandræðalegt,“ segir í umfjöllun miðilsins.