Örvhenta skyttan Magnus Rød leikur ekki meira með Noregi á Evrópumótinu í handknattleik vegna meiðsla, eins og áður hefur komið fram, og nú hefur Christian Berge þjálfari liðsins tekið nýjan leikmann inn í hópinn í hans stað.
Það er ekki önnur skytta eins og búast mátti við en Berge ákvað í staðinn að taka inn þriðja markvörðinn í hópinn, Espen Christensen. Fyrir eru í hópnum markverðirnir Torbjørn Bergerud og Kristian Sæverås en Bergerud hefur farið á kostum í norska markinu á mótinu.
Christensen er 34 ára gamall og ver mark Minden í Þýskalandi en gengur til liðs við sænska félagið Kristianstad í sumar.
Viðureign Íslands og Noregs hefst klukkan 17.15 í dag og fylgst verður með gangi mála í leiknum hér á mbl.is.