Janus Daði Smárason, landsliðsmaður í handknattleik, var í dag útnefndur leikmaður 11. umferðar í Meistaradeild Evrópu en það er EHF, Handknattleikssamband Evrópu, sem stendur fyrir valinu.
Janus lék mjög vel fyrir Aalborg og skoraði sex mörk þegar liðið gerði jafntefli við Pick Szeged í Ungverjalandi, 26:26, á sunnudaginn og krækti þar í dýrmætt stig á erfiðum útivelli.
Aalborg er eftir leiki helgarinnar öruggt með sæti í sextán liða úrslitum deildarinnar en liðið er í fjórða sæti af átta liðum í A-riðli keppninnar með 11 stig úr 11 leikjum.