Samdráttur og endurskipulagning í Breiðholti

Handknattleiksdeild ÍR sendi frá sér tilkynningu sem snýr að rekstri og stjórn deildarinnar vegna þess ástands sem komið er upp í samfélaginu.

Vegna breytinga í efnahagslífinu hefur ÍR neyðst til að draga saman allan kostnað og endurskipuleggja og koma jafnvægi á rekstur deildarinnar. 

Yfirlýsinguna má sjá hér fyrir neðan. 

Vegna stefnubreytinga hjá handknattleiksdeild ÍR, vill stjórn deildarinnar koma eftirfarandi á framfæri.

Samhliða samdrætti fyrirtækja í samfélaginu og niðursveiflu í efnahagslífinu hefur rekstrarumhverfi deildarinnar tekið miklum breytingum undanfarið. Deildin hefur því miður misst sterka styrktaraðila og þrátt fyrir mikla vinnu hefur ekki tekist að fylla í þau skörð.

Til þess að bregðast við þessum breytingum telur stjórn handknattleiksdeildar ÍR það eina ábyrga í stöðunni að draga saman allan kostnað, endurskipuleggja og koma jafnvægi á rekstur deildarinnar.

Við munum einbeita okkur því að nýta fjármuni og starfskrafta til þess að styrkja umgjörðina í kringum leikmennina okkar ásamt því að efla yngriflokkastarf félagsins enn frekar.

Fljótlega hefjast framkvæmdir við byggingu nýs íþróttahúss á ÍR svæðinu sem mun gjörbylta öllu starfi handknattleiksdeildarinnar til hins betra. Við teljum að með tilkomu þess og breyttum áherslum muni handknattleiksdeild ÍR koma enn sterkari tilbaka.

Virðingafyllst, stjórn handknattleiksdeildar ÍR

• Blogga um frétt