Afturelding komst í kvöld upp í toppsæti Olísdeildar karla í handbolta með 26:24-sigri á Selfossi á heimavelli. Var Afturelding með forystuna nánast allan tímann og sigurinn verðskuldaður. Eru Mosfellingar með fimm stig og Selfyssingar þrjú.
Afturelding byrjaði af krafti og náði mest fimm marka forskoti í fyrri hálfleik, 11:6. Var Arnór Freyr Stefánsson sterkur í markinu og varði m.a. þrjú vítaköst í hálfleiknum. Selfoss sótti í sig veðrið síðari hluta hálfleiksins og var staðan í leikhléi 14:11.
Selfoss byrjaði seinni hálfleikinn vel og jafnaði snemma í 16:16. Þá tóku heimamenn aftur við sér, komust í 22:19 og sigldu að lokum verðskulduðum sigri í hús.
Guðmundur Árni Ólafsson og Úlfar Monsi Þórðarson voru markahæstir hjá Aftureldingu með fimm mörk. Guðmundur Hólmar Helgason skoraði sjö fyrir Selfoss og Atli Ævar Ingólfsson gerði fimm mörk.