Enn ein breytingin hefur verið gerð á landsliðshópi karla í handknattleik en Ísland tekur á móti Litháen í undankeppni EM í Laugardalshöll á miðvikudaginn.
Hornamaðurinn Óðinn Þór Ríkharðsson, leikmaður Tvis Holstebro í Danmörku, kemur inn í hópinn í stað skyttunnar Kristjáns Arnar Kristjánssonar.
Kristján var í gær kallaður inn í hópinn fyrir Arnór Þór Gunnarsson. Nú er komið babb í bátinn og Kristján getur ekki svarað kallinu. Á hann í hættu að lenda í sóttkví eftir að liðsfélagar hans hjá Aix í Frakklandi greindust með kórónuveiruna.