Handknattleikssamband Evrópu (EHF) og danska handknattleikssambandið eiga nú í viðræðum vegna Evrópumóts kvenna í handknattleik.
Til stóð að Danmörk og Noregur héldu mótið í sameiningu eins og þjóðirnar gerðu árið 2010. Norska handknattleikssambandið hætti hins vegar við eins og fram kom á dögunum þar sem sóttvarnaaðgerðir í landinu gera mótshöldurum erfitt fyrir.
Í tilkynningu frá EHF kemur fram að báðir aðilar skoði með opnum huga að Danir taki alfarið að sér mótshaldið en viðræðurnar standa enn yfir. Mótið fer fram 3. - 20. desember en úrslitaleikurinn átti að fara fram í Noregi. Fyrir tíu árum fór úrslitaleikur mótsins fram í Herning í Danmörku.
Ísland á fulltrúa á mótinu því Þórir Hergeirsson er þjálfari norska landsliðsins eins og undanfarin ár.