Alexander til liðs við Guðmund

Alexander Petersson er búinn að semja við þýska 1. deildarliðið Melsungen, sem Guðmundur Þórður Guðmundsson landsliðsþjálfari stýrir, og mun söðla um að loknu yfirstandandi leiktímabili með Flensburg í sömu deild.

Alexander gekk til liðs við Flensburg í janúar á þessu ári frá Rhein-Neckar Löwen og stoppar því stutt, en kaupin á honum voru hugsuð sem tímabundin lausn eftir að Franz Semper meiddist á hné.

Fyrir utan Guðmund Þórð þjálfara mun Alexander hitta fyrir Arnar Frey Arnarsson og þá mun Elvar Örn Jónsson sömuleiðis ganga til liðs við Melsungen frá Skjern í sumar.

Melsungen, sem er um þessar mundir í 9. sæti þýsku deildarinnar, er greinilega stórhuga fyrir næsta tímabil því portúgalska stórskyttan André Gomes mun einnig ganga til liðs við félagið í sumar frá Porto.

• Blogga um frétt