Selfoss stendur vel af vígi eftir 31:25-sigur í fyrri leik sínum gegn Koprivnice frá Tékklandi í 1. umferð í Evrópubikar karla í handbolta í dag. Seinni leikurinn fer fram á morgun, en báðir leikir verða leiknir ytra.
Selfoss var með 19:12-forskot í hálfleik og var sigurinn ekki í hættu í seinni hálfleik en Selfoss náði mest níu marka forskoti, 27:18.
Einar Sverrisson var markahæstur hjá Selfossi með sjö mörk, Ragnar Jóhannsson skoraði sex og Hergeir Grímsson gerði fimm mörk.