Orri Freyr Þorkelsson fór á kostum með Elverum í norsku úrvalsdeildinni í handknattleik í gær þegar hann skoraði þrettán mörk í stórsigri liðsins gegn Sandefjord.
Elverum vann með miklum yfirburðum, 45:23, og er með fullt hús stiga á toppi deildarinnar eftir fjóra leiki. Orri, sem kom til félagsins frá Haukum í sumar, hafði hægt um sig og skoraði ekki í fyrsta leiknum en gerði síðan níu mörk í sigri á Haslum og tvö í sigri á Kristiansand.
Orri fær nóg af verkefnum hjá Elverum en liðið leikur í Meistaradeild Evrópu í vetur og gerði þar jafntefli, 27:27, við stórlið Vardar Skopje í fyrstu umferð í síðustu viku. Næsti leikur er á útivelli gegn þýska stórliðinu Kiel á miðvikudaginn.