Róbert Sighvatsson hefur verið ráðinn þjálfari handknattleiksliðs Kórdrengja. Þetta tilkynnti félagið á samfélagsmiðlum sínum í dag.
Kórdrengir leika í 1. deild karla á komandi leiktíð, Grill 66-deildinni, en liðið er nýliði í deildinni.
Róbert lék með Víkingi og Aftureldingu hér á landi og þá lék hann einnig sem atvinnumaður með Schutterwald, Düsseldorf, Dormagen og Wetzlar á ferlinum.
Þá hefur hann þjálfað Víking, Þrótt og Wetzlar í Þýskalandi á þjálfaraferli sínum en hann lék 160 leiki með íslenska landsliðinu þar sem hann skoraði 243 mörk.
„Kórdrengir eru með háleit markmið og höfum við trú á að Róbert sé rétti maðurinn í verkið,“ segir meðal annars í tilkynningu Kórdrengja.
Kórdrengir hefja leik í 1. deildinni á laugardaginn þegar liðið heimsækir Aftureldingu U að Varmá í Mosfellsbæ.