Fullyrt er í frétt á Vísi í dag að einn leikmaður þýska handknattleiksliðsins Lemgo hafi orðið eftir hér á landi vegna gruns um kynferðisbrot.
Samkvæmt Vísi var leikmaðurinn handtekinn í morgun, áður en liðsfélagar hans og aðrir úr starfsliði Lemgo héldu aftur til Þýskalands.
Lemgo og Valur léku fyrri leik liðanna í 2. umferð Evrópubikarsins á Hlíðarenda á þriðjudagskvöldið. Hafði Lemgo betur 27:26 og eiga liðin eftir að mætast í síðari leiknum í Þýskalandi.
Íslenski landsliðsmaðurinn Bjarki Már Elísson leikur með Lemgo. Í frétt Vísis segir að Bjarki hafi farið til Þýskalands með hópnum. Þar af leiðandi sé hann ekki sá leikmaður sem um ræðir.