Pólsku meistararnir í Kielce komust í kvöld auðveldlega í undanúrslit Meistaradeildar karla í handknattleik með sigri gegn Montpellier frá Frakklandi í seinni leiknum á sínum heimavelli, 30:22.
Kielce stóð vel að vígi eftir sigur í fyrri leiknum í Frakklandi, 31:28, og gerði nánast út um einvígið í fyrri hálfleiknum í kvöld en að honum loknum var staðan 15:8 og Pólverjarnir með samanlagt tíu mörk í forskot.
Þeir fylgdu því eftir og unnu afar sannfærandi sigur. Haukur Þrastarson skoraði eitt mark fyrir Kielce en hann var eini Íslendingurinn á vellinum því Sigvaldi Björn Guðjónsson hjá Kielce og Ólafur Guðmundsson hjá Montpellier voru fjarri góðu gamni vegna meiðsla.
Hér fyrir neðan má sjá Hauk skora ellefta mark Kielce í leiknum:
Haukur Thrastarson makes breaking through the @mhbofficiel defence look simple for @kielcehandball 👊#ehfcl #showtimeforchampions pic.twitter.com/ONeNiwcYOE
— EHF Champions League (@ehfcl) May 18, 2022