Arna Sif Pálsdóttir, ein reyndasta handknattleikskona landsins og landsliðskona um árabil, er gengin til liðs við Íslandsmeistara Fram og hefur samið þar til tveggja ára.
Framarar skýrðu frá þessu á samfélagsmiðlum sínum í dag. Arna er 34 ára gömul, leikur sem línumaður, en hún spilaði ekkert á síðasta tímabili vegna barneigna. Arna lék um árabil sem atvinnumaður í Danmörku, Frakklandi og Ungverjalandi, og er í hópi leikjahæstu landsliðskvenna Íslands. Hún lék með HK áður en hún fór í atvinnumennsku en síðan með ÍBV og Val eftir heimkomuna.