Sigur með minnsta mun og HM-sætið tryggt

Íslenska karlalandsliðið skipað leikmönnum 18 ára og yngri hafði betur gegn Svartfjallalandi með minnsta mun, 30:29, þegar liðin mættust á Evrópumóti karla í aldursflokknum í Podgorica í Svartfjallalandi í dag.

Með því að sigra í dag mun Ísland spila um 9. – 12. sæti á EM. Með sigrinum tryggði liðið sér í leiðinni sæti á HM 19 ára á næsta ári auk sætis á EM 20 ára eftir tvö ár.

Sigurinn var því ansi mikilvægur upp á þátttöku liðsins á næstu stórmótum að gera.

Markahæstir hjá Íslandi voru þeir Viðar Ernir Reimarsson og Kjartan Þór Júlíusson, báðir með sex mörk, og skammt undan var Atli Steinn Arnarsson með fimm mörk.

• Blogga um frétt